Xente da familia real

San Sadurniño, 1913

Practicamente todos os xornais de Galicia anunciaron o 20 de xullo de 1913 a chegada á residencia veraniega dos Marqueses de San Sadurniño de varios membros da familia real. Nesta ocasión serán Carlos de Borbón Dos Sicilias e a súa segunda esposa Luisa de Orleans- avós maternos do Rei Juan Carlos I-; ademais dos irmáns de Don Carlos, Raniero de Borbón-Dos Sicilias e Felipe de Borbón-Dos Sicilias. Pasarán dous felices días no Pazo da Marquesa e serán debidamente agasallados tanto en San Sadurniño como nas visitas oficiais en Ferrol. O gobernador civil da provincia achegarase ao Pazo para cumplimentar aos ilustres visitantes. (Ver documento)
Días despois, a Marquesa Natividad Quindós organizará unha festa privada no Pazo e na fraga: “Una hermosa fiesta en honor a don Carlos y a su esposa la princesa Luisa. Al acto que resultó brillantísimo asistió lo más granado de la sociedad ferrolana” (El regional 23/7/1913). Asemade pasaron varios días de xullo a Marquesa de Casa Pabon e a "señorita de compañía" Joaquina Catalán. O Pazo de San Sadurniño segue a ser un centro de referencia para a alta nobreza española na temporada estival, un oasis para a elite aristocrática, mais nun contexto de pobreza e nulas perspectivas de progreso que está a obrigar a moitos veciños á emigración.
Na fotografía, familia Borbón-Orleans, coa súa descendencia, a segunda nena pola dereita, María de las Mercedes, será a nai de Juan Carlos I.