Os Condes de Maceda en San Sadurniño

San sadurniño, 1912

Ignoramos si aconteceu algunha nova salientábel no Pazo de San Sadurniño no verán de 1912. Mais supoñemos as rutinas "aristocráticas" de anos anteriores: paseos, tenis, tertulias, lecturas, misas... e pouco mais. Arredor do 8 de xullo chegaron Natividad Quindós e o seu marido xunto coa indispensábel marquesa de Almaguer, irmá do Duque, “para pasar a temporada de verán”.
Algúns dos visitantes que pasearon pola fraga e percorreron as estancias da “señorial mansión” de San Sadurniño, serán membros moi destacados da aristocracia galega: a riquísima Lucía Ozores y Ramírez de Saavedra, Condesa de Maceda e a filla Beatriz Losada y Ozores, Vizcondesa de Fefiñanes. O seu marido era Baltasar de Losada e Torres, Conde de San Román, Conde de Maceda, Vizconde de Fefiñanes, Grande de España e senador vitalicio. Este poderoso aristócrata e político conservador visitou o pazo dos Marqueses moitos veráns ata a súa morte en 1935. A gran amizade cos Duques da Conquista quizais garde relación co agasallo de 96 perdices por parte de Alfonso XIII a comezos de 1912 ou os 12 cervos de 1904, posto que o Conde de Maceda era, ademais, Primeiro Monteiro do Rei.