"O seixo sentido"

Naraío, 2024

8ª Chanfaina Lab (26). Estrea: venres 17 de maio do 2024
Guión, cámara, dirección e montaxe: Noa Cortizas e Suevia Fernández
Actor: Darío Fernández Lanza
Música: Aula de música tradicional do CMus Xan Viaño
Coa colaboración de Iago Lourido e Joám Cortizas.
Sinopse: "A procura de inspiración dun pintor non atopa acomodo. Canto máis a procuras menos te das conta de que está ao teu carón."
Duración: 5’ 44’’
Gravado nos arredores do Castelo de Naraío dentro do programa da 8ª Chanfainalab



Noa Cortizas Fernández, (Ferrol, 2005) estudou Bacharelato de artes e estudia piano no Conservatorio de Música. É unha apaixonada da arte; música, pintura, teatro e audiovisuais, polo que este ano animouse a participar na Chanfainalab coa súa compañeira Suevia Fernández Cabana, (Ferrol, 2006) quen estudou o Bacharelato de artes no "Concepción Arenal" de Ferrol, e tamén é unha apaixonada das artes en xeral.

Noa e Suevia -benxaminas da Chanfainalab- achegáronse á San Sadurniño como unha oportunidade de amosar o seu talento pero sen un fío claro do que tirar: "Este proceso non foi nada doado para nós, xa que cando chegamos o día das filmacións non tiñamos ningunha idea fixa, só sabíamos que queríamos facer algo que tivera que ver cun pintor. Ese mesmo día, cando xa tiñamos que comezar a gravar, ocorréusenos reflexar a nosa situación na curta, un pintor sen ideas. Ao inicio íamos facer algo serio pero resultou imposible co noso actor Darío Fernández Lanza, xa que todo o que gravábamos con el resultaba cómico, ben fora polas caras ou polos movementos que facía. Debido a isto, decidimos darlle unha volta á idea e aproveitar isto para facer a curta cun punto cómico. Despois aínda tiñamos que buscar un final e igual que antes, non se nos ocorría nada, estivemos bastante estresadas porque non atopábamos un bo remate para a historia. Finalmente, nun arrebato ocorréusenos facer o final máis absurdo que atopásemos, e así fixemos. Con isto quixemos reflectir que a inspiración aparece cando menos a buscas, no momento máis aleatorio e absurdo posible. Pero a cousa non remata aquí, aínda faltaba o son da peza, xa que practicamente non aparece a voz humana. Decidimos engadirlle música xa que só co son de ambiente quedaba moi soso. Así, coa axuda de Pedro Fariñas (profesor da materia de Música Tradicional Galega) e outros alumnos creamos e gravamos a música a raíz dunha Pasacorredoiras e adaptámolo á propia curta para que cadrase co vídeo".

"O seixo sentido" case é como unha comedia slapstick, efectiva e resultona, cunha historia "física”, case como unha homenaxe ao cinema mudo, creada polas novísimas autoras da peza, interesadas en todos os procesos que teñan que ver coa Arte: "Coidamos que nos quedou unha comedia sen pretendelo inicialmente. Co final elixido pretendemos crear expectación ou confusión, pois pode que algunhas persoas non entendan ben o que pasa ata que volven ler o título, “O seixo sentido”, que fai referencia ao seixo que colle ao final e onde lle ven finalmente a inspiración. En xeral estamos moi contentas co resultado final, pero o que máis valoramos é a experiencia e os momentos que pasamos gravando e editando”. Neste sinxelo pero entretido relato están as bases do que pretende a Chanfainalab: crear un clima de exploración e procura, sentir a ledicia de filmar e descubrir o que somos e queremos. E como ben nos contan Noa e Suevia, a “inspiración” está case sempre diante dos ollos, mais non somos quen de percibila as veces. En definitiva, unha lección optimista que nos achegan as ganas de aprender e vivir de dúas prometedoras creadoras de 18 anos.
Fotografías de César Galdo.