"Notas para unha intervención"

San sadurniño, 2025

9ª Chanfaina Lab (15). Estrea: venres 25 de abril do 2025
Dirección, guión, cámara e montaxe: Cora Peña
Reparto e coguionista: Luisa Trigo
Localizacións: Abel Vega e Iago Lourido
Duración: 10' 30''
Sinopse: "Axente TRIg, cos seus misteriosos dons, encarna no noso mundo para estudar unha posible intervención. Alguén recolle notas do proceso"
Gravado en Naraío, Alto de Forgoselo, San Sadurniño, Granxa A Esperanza, río Castro, canteira abandonada, festa de San Pipote, dentro do programa da 9ª Chanfainalab



Cora Peña, (Vigo 1968) é licenciada en Ciencias da Información (UCM) e graduada en dirección de fotografía pola EICTV (Cuba). Tras exercer como directora de fotografía en varias curtas de ficción, estreouse como directora na mediometraxe ópera rock viguesa "The last patrol" (2000). Nos últimos anos enxergouse intensamente no xénero documental, con longametraxes de contido socio-ambiental como "Apash, os de fóra" (mundo indíxena fronte a extractivísmo na Amazonía peruana); "Tesouro de Corcoesto" (resistencia popular fronte ao proxecto de mina de ouro na Costa da Morte) ou puramente social como "Agromantes" (procesos de loucura e psiquiatrización en primeira persoa). Ven de estrear na plataforma de Agalega "Arborismos" , unha serie documental sobre as árbores orientado ao público infantil. Actualmente desenvolve o documental "A man dentro da luva". Nas súas producións documentais adoita exercer de muller-orquestra, desempeñando os roles de guionista e directora, produtora, operadora e montadora.

Cora achegouse a San Sadurniño sen un plan previo. Os seus ollos encalecidos no documentalismo crítico trataron de “entender” un territorio para ela descoñecido, ata que aos poucos topou co fío condutor: “Fun a San Sadurniño sen guión nin preprodución, sen ter claro se ía facer documental ou ficción, confiando en que o nin da experiencia aportase a historia. E así foi, o acompañamento tranquilo e compartidor de Iago e Abel na procura de localizacións e o ambiente agarimoso que se da na Chanfainalab afrouxaron a tensión da folla en branco e posibilitaron que recollera o necesario para poder construír este pequeno relato. Estou afeita a traballar de xeito rápido, pero neste caso houbo algo de vertixe ao abordar a peza case desde cero; só sabía que as vacas terían unha presenza clave pero nin sequera estiven certa de que Luisa -a miña axudante- ía poder acompañarme ata o día antes da rodaxe. Ela, presente de costas ante a cámara, aportou non só ocorrencias no aspecto formal senón tamén inspiración para atopar a idea guía da historia, a partir da súa sensibilidade respecto ao medio e, especialmente, aos animais"

"Notas para unha intervención" é unha peza que se interna no noso territorio con notas de ciencia ficción e reclama a nosa atención polo estilizado rexistro cromático e un certo ar de misterio que as persoas espectadoras deberán iluminar: "A breve duración creo que xoga a favor da historia. O guión foi aparecendo de xeito intuitivo, pescando datos e localizacións sobre a marcha, e só acabou de revelarse na mesa de montaxe. Unha historia que, debuxada a trazo gordo e non exenta de crítica, deixa pistas para que o espectador a complete". A proposta da cineasta viguesa é que adoptemos un punto de vista insólito, quizais un extraterrestre, que percorre o noso concello entre luminosas cores viradas e tomando notas da natureza e os seres vivos que habitan no territorio para poder entendelo antes do contacto definitivo. Que desfruten desta fermosa viaxe exploratoria da nosa contorna a través dos ollos do axente TRIg.
Fotografías de César Galdo.