"Homilías neoliberales/Decrecentismo"

Silvalonga, 2017

4ª Chanfaina'Lab (17). Estrea venres, 2 de xuño do 2018
Director: "Asociación ConcienciArte": David Anca, Miguel Sanjurjo e Patricia Lamas.
Actores: Iván PX e David Anca
Sinopse: "Homilía do pastor Mariano Sánchez de Rivera sobre o decrecemento".
Duración: 6´13”
Gravada nos días 2 e 3 de setembro do 2017 en Silvalonga dentro do programa da 4º Chanfaina' Lab..



A "Asociación ConcienciArte, cultura colectiva do rural" naceu no 2014 como froito da inquedanza dun grupo de persoas interesadas en novas alternativas e xeitos de vida. Actualmente conta con 36 socios. Os obxectivos da "Asociación ConcienciArte" son -sobre todo- a divulgación e concienciación de novas alternativas vitais no entorno rural. Tamén apostan por un mundo máis xusto, equilibrado e autoxestionado: enerxías libres, alimentación consciente, saúde e plantas medicinais, a música e o creativo como instrumentos de sanación ou o grupo de consumo de produción ecolóxica que xestionan. Habitualmente realizan numerosas actividades como obradoiros de teatro, canto, yoga, plantas, radio, etc. Pode seguirse a dinámica da Asociación a través do seu Facebook. Asemesmo, unha das súas teimas- xunto coa música- é a produción de filmes humorísticos, que difunden a través da canle ConcienciaTV. Nos seus vídeos tentan poñerlle retranca a todo, nomeadamente á algúns dos valores dominantes na sociedade contemporánea, como se pon de manifesto nas pezas producidas nas edicións da Chanfainalab "O meigo mouro do repetidor" (2015), ou "Flipacan" (2016) .

Nesta edición, a xente de ConcienciArte apostou por gravar unha peza que puidera ser ademais unha achega do colectivo á "Rede de Decrecemento Eo Navia /Galiza /O Bierzo", que vai organizar este outono o 1º Congreso de Decrecemento. Unha proposta participativa na que se xuntan a cultura,o lecer, o respecto polo ambiente e, en resume, os xeitos de conducir a sociedade cara a un mundo distinto e sostible: "David xa escribira varias homilías neoliberais y pensamos que era un bo formato: unha "autoridade moral" -o capital-, que nos sermonea sobre cómo temos que (mal)vivir para que eles sigan forrados. O vídeo realizámolo nun plano fixo rodado dun tirón, nada complicado, mais sí que damos moita importancia á mensaxe do texto e a reflexión á que pode dar pé. Esa é a idea, -a de decrecer-, coa que coincidimos: fai falla un cambio radical de todos a respecto de cómo o noso xeito de vida afecta ao planeta , e ao medio ambiente, a outros países, a outras culturas, outras identidades... fai falla un reprantexamento dos nosos valores e prioridades: persoais e colectivas".

"Homilías neoliberales/Decrecentismo" é unha curta realizada baixo a estrutura dun monólogo, mais co estilo irreverente e inconformista habitual doutras pezas deste colectivo de cineastas locais. Neste caso a partires do discurso retranqueiro dun predicador do neoliberalismo que fai un panexírico da economía e das grandes fortunas como únicos dogmas de fe que deberían rexer o mundo e a vida dos pobres mortais. Como reivindican sempre: "nós pretendemos concienciar sobre “o absurdo” de querer seguir medrando indefinidamente a costa dun planeta que é finito". Con esta peza podemos comprobar de novo a diversidade de estilos e propostas dos filmes da Chanfainalab. A homilía deste pastor de novo cuño ensina que o audiovisual tamén pode ser un altofalante para expoñer ideas que procuran mellorar o mundo no que vivimos e... botar ao tempo unhas risas; como, por certo, tamén o procuraban moitos textos dramáticos e monólogos do teatro popular galego do primeiro terzo do século XX.
Fotografías de Cesar Galdo e Gabriel Tizón