Premio Mellor iniciativa Europea Acting - Ginebra 2015 Premio Mellor webserie VO Galego - Carballo Interplay 2017 Mellor vídeo opinarmos - Premio Youtubeir@s 2017 Mellor iniciativa cultural dirixida a persoas maiores - Premio Fundación DomusVi Boas prácticas na xestión cultural - Asociación Galega de Profesionais da Xestión Cultural (AGPXC) Premio Rodolfo Prada á xestión cultural 2018

documentos

Ademais das imaxes, tamén a prensa e os documentos históricos fálannos de San Sadurniño no decurso do tempo: Podes velos en orde cronolóxico aquí , ou consultar algúns datos estatísticos

Juan Freire de Andrade e Lanzós, II Señor de San Sadurniño

San Sadurniño, 1527

II Señor de San Sadurniño (1527-1548)
Juan Freire de Lanzós foi o fillo maior dos fundadores do Señorío de San Sadurniño e morreu arredor de 1548. O seu pai fora Fernando de Andrade e a súa nai Inés de Castro e Lanzós, filla de Alonso de Lanzós, caudillo da insurrección irmandiña. Juan Freire de Andrade e Lanzós será o primeiro herdeiro do Señorío de San Sadurniño. A raíña Dona Juana autorizara o morgado do Señorío o 15 de xuño de 1515, creándose definitivamente en 1526.
É de imaxinar que a infancia do II Señor de San Sadurniño foi tan doada como era de feito a de todos os fillos dos privilexiados na baixa idade Media. A súa familia dispuña de pazos residenciais en San Sadurniño, Cerdido, Somozas, mesmo unha casa grande en Cedeira e estaba a construir outro pazo en Santa Mariña. Tiña xurisdición´"civil e criminal" sobre un gran número de terras e vasalos que traballaban para eles. Juan nacera vinculeiro nobre en casa nobre e manterá o seu status aristocrático ata a súa morte en 1548, aínda baixo do reinado do emperador Carlos I.
O feito que no seu sartego apareza vestido como cortesán renacentista e non como cabaleiro medieval, e que sosteña un libro nas mans indica que posiblemente recibira unha esmerada educación. Na súa nenez viviu en primeira persoa a teima dos pais por fundar un morgado que perpetuara o nome e a fortuna familiar, da que sería o principal beneficiario. É de supoñer que a súa nai, Inés de Castro e mais a avoa materna María, contaríanlle unha e outra vez as fazañas do seu vizoso avó, inimigo acérrimo dos Andrade na Guerra Irmandiña e que morrera como un perdedor na cidade de Coruña coas súas posesións usurpadas. A súa avoa aínda pleitaba en 1492 para recuperar os bens roubados polos Andrade e o Conde de Lemos ata que as recuperaron. Por iso, durante toda a súa vida foi teimudo na defensa do patrimonio herdado e manifestou vontade explícita por perpetuar a lembranza dos seus pais; mesmo ampliou o patrimonio da casa considerablemente mercando por 500.000 marabedís o couto do Pedroso en 1544, o que convertería o Señorío dos Andrade-Lanzós nun dos mais sobranceiros de Ferrolterra.
Por outra banda, Juan Freire támén amosou certo carácter bravo. Botou aos capeláns que atendían ao convento do Rosario dende súa fundación -por incumpremento do "contrato"-, substituíndoos por Franciscanos, mais advertindo aos sucesores que fixeran o mesmo se os discípulos de San Francisco incomprían coas obrigas (Ver testamento).
Casou ben coa tamén nobre María de Losada e Valcarcel –das terras do Bierzo- deixando tres fillos:

1.- Pedro de Andrade e Castro, III Señor de San Sadurniño.

2.- Luís de Andrade, casou con Dª Antonia Osorio. Veciños de Villafranca del Bierzo.

3.- Catalina de Andrade, (-1567) casou con Ares Pardo de Lago, emparentando así co Señorío de Baltar.

Xoán Freire outorgou testamento o 3/05/1548 perante o escribán Gonzalo Tenreiro. Nel insiste na lealdade aos seu pais e na memoria e conservación dos principios fundacionais do morgado para os sucesores. Mesmo no seu sartego da Igrexa de San Sadurniño deixou escrita -ben clariña- a súa derradeira vontade:

"Este fue Juan de Andrade y este monasterio y los frailes del son obligados por su ánima de cada día decir una misa cantada con su responso y otra misa rezada y responso cantado por las ánimas de Fernando de Andrade y Ines de Castro, padre y madre del dicho Juan Freire, el cual pone pena de bendición y maldición al heredero y sucesores de su casa que para siempre jamás hagan decir las sobredichas dos misas cantada y rezada con dos responsos. Partiose de este mundo en el año de ¿¿??"

Juan Freire de Andrade e Lanzós, II Señor de San Sadurniño

Documentos:

Os señores de San Sadurniño. Fundación do morgado de San Sadurniño. Fernando Dopico Blanco
Os Señores de San Sadurniño mercan o Couto de Pedroso (1544)
Posesións do mosteiro do Pedroso no concello de San Sadurniño en 1544
Testamento de Juan Freire de Andrade, II Señor de San Sadurniño
Análise do sartego de Juan Freire de Andrade. Margarita Sánchez
Documento fundacional do morgado de San Sadurniño

Comentarios

Máis imaxes

Temas: Convento do Rosario, igrexas parroquiais, Pazo da Marquesa, Pedroso, San Sadurniño (Concello), Señores de San Sadurniño

Autor/a: Manuel González Álvarez

Compartir en: